मानिसको अवचेतन मनमा लुकेको शक्तिलाई उपयोग गरेर कसरी आर्थिक, मानसिक र आध्यात्मिक समृद्धि हासिल गर्न सकिन्छ भन्ने कुरा सिकाउने ‘तपाईंको असीमित समृद्धिको शक्ति’ (Your Infinite Power to Be Rich) डा. जोसेफ मर्फीद्वारा लिखित एक लोकप्रिय आत्मसुधार तथा सकारात्मक सोचमा आधारित प्रेरणादायी पुस्तक हो।यस पुस्तकमा अवचेतन मनको शक्ति प्रयोग गरेर धन आर्जन गर्ने, समृद्धिप्रति सकारात्मक दृष्टिकोण विकास गर्ने र प्राप्त धनलाई उचित रूपमा व्यवस्थापन गर्ने विषयमा चर्चा गरिएको छ। पुस्तकमा जम्मा १५ वटा शीर्षकमार्फत धन प्राप्ति, आर्थिक समृद्धि र जीवनमा सकारात्मक परिवर्तन ल्याउने विभिन्न उपाय तथा सिद्धान्तहरू प्रस्तुत गरिएका छन्।यस पुस्तकका मुख्य शिक्षा र सिद्धान्तहरू यस प्रकार छन्।
पुस्तकका अनुसार गरिबीमा रहनु कुनै राम्रो अवस्था होइन। लेखकले गरिबीलाई मानसिक सोच र धारणासँग जोडेर व्याख्या गरेका छन्। हरेक मानिस यस धरतीमा सुख, शान्ति र प्रचुरतापूर्ण जीवन जिउन चाहन्छ। जब हजुर आफ्नो सोच्ने तरिका परिवर्तन गर्नुहुन्छ, तब हजुरको आर्थिक अवस्था सुधार हुन पनि थाल्छ।हाम्रो अवचेतन मनले हामीले बारम्बार सोच्ने, सत्य मानेर विश्वास गर्ने र स्वीकार गर्ने कुराहरूबाट प्रभावित भएर हाम्रो व्यवहार तथा निर्णयलाई दिशा दिन्छ। यदि हजुरले मनमा सधैँ अभाव, गरिबी र डर पालिरहनुभयो भने त्यसले आत्मविश्वास कमजोर बनाउन र नयाँ अवसर पहिचान गर्न बाधा पुर्याउन सक्छ। तर, हजुरले आफूलाई समृद्ध र सफल व्यक्तिका रूपमा कल्पना गर्दै सकारात्मक सोच, निरन्तर प्रयास र सही निर्णयमा ध्यान दिनुभयो भने समृद्धिका नयाँ ढोकाहरू खोल्न सक्नुहुन्छ।
धेरै मानिसहरू पैसा सबै खराब कुराको जड हो भन्ने सोच्छन्। पुस्तकका अनुसार यस्तो नकारात्मक सोचले पैसाप्रति हाम्रो दृष्टिकोण र व्यवहारलाई नकारात्मक रूपमा प्रभावित गर्न सक्छ। त्यसैले पैसालाई समाजको भलाइ गर्ने तथा आफ्नो र अरूको जीवन सहज बनाउने एउटा महत्त्वपूर्ण साधनका रूपमा हेर्नुपर्छ।आफूले चाहेको आर्थिक लक्ष्य वा सफलता प्राप्त गरिसकेको जस्तो गरी मनमा स्पष्ट चित्र बनाउनुहोस्। यस्तो कल्पनाले लक्ष्यप्रति ध्यान केन्द्रित गर्न र त्यसलाई प्राप्त गर्न आवश्यक कदम चाल्न प्रेरित गर्न सक्छ। साथै, दैनिक रूपमा “म दिनप्रतिदिन आर्थिक र मानसिक रूपमा समृद्ध बन्दै गइरहेको छु” जस्ता सकारात्मक वाक्यहरू दोहोर्याउने अभ्यास गर्नुहोस्। यसले आत्मविश्वास बढाउन, सकारात्मक दृष्टिकोण विकास गर्न र लक्ष्यप्रति प्रतिबद्ध रहन सहयोग पुर्याउन सक्छ। तर, सकारात्मक सोचसँगै निरन्तर परिश्रम, सही योजना र आर्थिक अनुशासनलाई पनि महत्त्व दिनुपर्छ।
हजुरसँग अहिले जे-जति छ, त्यसप्रति कृतज्ञ रहनुहोस् र धन्यवाद दिने बानी बसाल्नुहोस्। कृतज्ञताको यो अभ्यासले हजुरलाई जीवनका सकारात्मक पक्षहरू पहिचान गर्न र उपलब्ध अवसरहरूको सदुपयोग गर्न प्रेरित गर्छ। पुस्तकका अनुसार त्रास, कन्जुस्याइँ र अभावको मानसिकताले मानिसलाई सधैँ अभावमै सीमित राख्न सक्छ, जबकि उदार मन, सकारात्मक सोच र सहयोगी भावनाले समृद्धितर्फ अघि बढ्न प्रेरित गर्छ।यदि हजुर यस पुस्तकमा उल्लेख गरिएका व्यावहारिक अभ्यासहरू, अवचेतन मनको शक्ति उपयोग गर्ने विधिहरू तथा आर्थिक, मानसिक र आध्यात्मिक रूपमा समृद्ध बन्ने उपायहरूबारे थप जान्न चाहनुहुन्छ भने हामीसँग सम्पर्क राख्नुहोस्।हेल्प टु हेल्प। धन्यवाद!
