पुस्तक परिचय: पैसा कमाउने कला (The Art of Money Getting)आफ्नो आम्दानीअनुसार जीवनयापन गर्नु नै बुद्धिमानी हो। भविष्यलाई सुरक्षित बनाउन केही रकम बचत गर्नुहोस् र आर्थिक आवश्यकताका लागि पहिल्यै तयारी गर्नुहोस्। गरिबीतर्फ धकेल्ने बानी र अनावश्यक खर्चलाई त्यागेर मात्र धनसम्पत्ति आर्जन गर्न सकिन्छ। आफ्नो सम्पूर्ण आम्दानी खर्च गर्ने व्यक्ति कहिल्यै आर्थिक रूपमा स्वतन्त्र बन्न सक्दैन भन्ने महत्त्वपूर्ण सन्देश यस पुस्तकले दिन्छ।सन् १८८० मा प्रकाशित पैसा कमाउने कला (The Art of Money Getting) प्रसिद्ध अमेरिकी उद्यमी तथा व्यवसायी पी. टी. बार्नम (P. T. Barnum) द्वारा लिखित एक लोकप्रिय पुस्तक हो। यस पुस्तकले धन कमाउने, आम्दानीको उचित व्यवस्थापन गर्ने, बचत गर्ने र आर्थिक रूपमा आत्मनिर्भर बन्ने विषयमा उपयोगी मार्गदर्शन प्रदान गर्छ।
यस पुस्तक पैसा कमाउने कला (The Art of Money Getting) मा धन आर्जनसम्बन्धी २० वटा शीर्षकअन्तर्गत छोटा तर महत्त्वपूर्ण सन्देशहरू प्रस्तुत गरिएको छ। तीमध्ये केही प्रमुख सन्देशहरू यस प्रकार छन्।आफ्नो रुचि, प्रकृति र स्वभावसँग मेल नखाने काममा लाग्दा सफलता हासिल गर्न कठिन हुन्छ। त्यसैले पेसा वा व्यवसाय छनोट गर्दा आफ्नो क्षमता, रुचि, सीप र सम्भावनालाई ध्यानमा राख्नुपर्छ। आफूलाई उपयुक्त काम वा व्यवसाय छनोट गर्न सकेमा सफल हुने सम्भावना बढ्छ।त्यसैगरी, आम्दानीभन्दा खर्च कम हुनुपर्छ। अनावश्यक खर्च तथा विलासिताका वस्तुहरूको मोह त्यागेर बचत गर्ने बानी विकास गर्नुपर्छ। आफ्नो खर्चमा नियन्त्रण राख्दै नियमित रूपमा बचत गर्ने बानी बसाल्न सकेमा आर्थिक अवस्था बलियो बनाउन र धन आर्जनको बाटोमा अघि बढ्न सकिन्छ।
उपभोग्य वस्तु खरिद गर्न वा अनावश्यक खर्च पूरा गर्न कहिल्यै ऋण लिनु हुँदैन। यदि ऋण लिनैपर्ने अवस्था आएमा त्यसको सदुपयोग गरी थप आम्दानी वा नाफा आर्जन गर्न सकिने उत्पादनमूलक काममा लगानी गर्नुपर्छ।छोटो समयमा धेरै ठाउँमा लगानी गर्नु वा एकैपटक धेरै व्यवसायमा हात हाल्नुभन्दा आफूले राम्रोसँग जानेको, सीप भएको र सफल हुने सम्भावना रहेको एउटा मुख्य व्यवसायमा ध्यान केन्द्रित गर्नु बुद्धिमानी हुन्छ। एउटै काममा पूर्ण एकाग्रता, निरन्तर प्रयास र मिहिनेत लगाउन सकेमा काम व्यवस्थित हुनुका साथै सफलता हासिल गर्ने सम्भावना पनि बढ्छ।
व्यापार गर्दा सधैँ इमानदार, सत्यनिष्ठ र विश्वासयोग्य हुनुपर्छ। ग्राहकहरूसँग राम्रो व्यवहार गर्दै उच्च नैतिकता कायम राख्नुपर्छ। यसले दीर्घकालीन रूपमा व्यावसायिक प्रतिष्ठा बढाउनुका साथै आम्दानीमा पनि सकारात्मक प्रभाव पार्छ।आफ्नो स्वास्थ्यको सधैँ ख्याल राख्नुपर्छ, किनकि राम्रो स्वास्थ्य नै ठूलो सम्पत्तिको आधार हो। शारीरिक तथा मानसिक रूपमा स्वस्थ व्यक्तिले आफ्नो काम प्रभावकारी ढङ्गले गर्न सक्छ र आर्थिक उन्नतिका लागि निरन्तर प्रयास गर्न सक्छ।त्यसैगरी, विज्ञापन तथा प्रचारप्रसारका विभिन्न माध्यमको सदुपयोग गरी आफ्नो उत्पादन वा सेवाबारे मानिसहरूलाई सही, स्पष्ट र प्रभावकारी रूपमा जानकारी दिनुपर्छ। यसले ग्राहकसम्म पुग्न र व्यवसायको विस्तार गर्न सहयोग पुर्याउँछ।के हजुर यस पुस्तकमा उल्लेख गरिएका सबै महत्त्वपूर्ण नियमहरूको विस्तृत विवरण जान्न र बुझ्न चाहनुहुन्छ? आउनुहोस्, हेल्प टू हेल्पसँग जोडिनुहोस् र ज्ञान तथा सफलतातर्फको यात्रामा अघि बढ्नुहोस्।धन्यवाद!
